Xamaas ayaa shuruud ku aqbashay qorshaha hub-ka-dhigista Gaza, iyadoo sheegtay in hubkeeda lagu wareejin karo kayd uu maamulo guddi Falastiini ah kaddib marka Israa’iil joojiso weerarrada, ciidamadana kala baxdo dhulka ay haystaan.
Ghazi Hamad, oo ka tirsan wafdiga wadaxaajoodka Xamaas, ayaa Reuters u sheegay in heshiisku yahay hannaan guud oo “adag”, balse fulintiisu ku xiran tahay Israa’iil oo marka hore raacda waajibaadkii heshiiskii Sharm el-Sheikh.
Maxaa ku jira qorshaha hub-ka-dhigista Gaza?
Qorshaha 15-ka qodob ka kooban wuxuu dhigayaa in hubka culus, goobaha wax-soo-saarka hubka, bakhaarada iyo godadka militari la diiwaangeliyo, lana geliyo kayd uu kormeero Guddiga Qaranka ee Maamulka Gaza, oo ah maamul rayid Falastiini ah.
Al Jazeera, oo sheegtay inay aragtay nuqulka heshiiska, ayaa werisay in qorshaha faahfaahsan lagu diyaarinayo 14 maalmood gudahood. Hubka looma dhiibayo Israa’iil ama dhinac aan Falastiini ahayn, halka kala bixitaanka ciidamada Israa’iil uu marxalad-marxalad ula soconayo kaydinta hubka.
Maamulka cusub ee rayidka ah iyo Ciidanka Xasilinta Caalamiga ah ayaa la filayaa inay Gaza galaan si ay ula wareegaan adeegyada dadweynaha, amniga iyo kormeerka geeddi-socodka. Qaabka, tirada iyo dalalka ciidankaas ka qaybgalaya wali si buuxda looma shaacin.
Israa’iil wali ma ansixin
Khilaafka ugu weyn wuxuu ku saabsan yahay cidda tallaabada koowaad qaadaysa. Xamaas waxay dalbanaysaa joojinta weerarrada, kordhinta gargaarka iyo bixitaanka ciidamada ka hor kaydinta hubka. Sarkaal Israa’iili ah ayaa sheegay inaan ciidamadu ka bixi doonin xariiqda ay hadda joogaan ilaa hub-ka-dhigis dhab ahi dhacdo.
Dowladda Israa’iil wali si rasmi ah uma ansixin qorshaha. Wasiir ka tirsan xukuumadda ayaa diiday qabyo-qoraalka, halka weerarro cusub laga soo sheegay Gaza. Sidaas darteed, heshiisku waa horumar diblomaasiyadeed oo muhiim ah, balse ma aha nabad kama dambays ah ama jadwal fulin oo la isku raacay.
Tani waa horumar cusub oo daba socda wada-hadalladii xabbad-joojinta Gaza ee Gaawe hore uga warramay.
